Рөстәм Миңнеханов ФАС җитәкчесе урынбасарына «ТАССРның 100 еллыгы» медален тапшырды
Татарстан Президенты ТР Хөкүмәте йортында статс-секретарь – Монополиягә каршы федераль хезмәт җитәкчесе урынбасары Андрей Цариковский белән очрашты.
Очрашуда ведомство каршында торган бурычларны үтәү өлкәсендә үзара хезмәттәшлек итү сораулары каралды.
Рөстәм Миңнеханов Андрей Цариковскийга Татарстан Республикасының дәүләт бүләген - «ТАССРның 100 еллыгы» медален тапшырды.
Исегезгә төшерик, бүген ФАС җитәкчесе урынбасары Казанда Россия Монополиягә каршы федераль хезмәтнең Укыту-методика үзәгендә уздырыла торган конференциядә катнаша, чара нефть-газ тармагында биржа сәүдәсе перспективаларына багышланган.
Бүген үк Андрей Цариковский, ТР Премьер-министры урынбасары – ТР сәнәгать һәм сәүдә министры Альберт Кәримов, «Газпром межрегионгаз Казан» АҖ генераль директоры Ринат Сабиров, «Газ-транспорт компаниясе» ҖЧҖ генераль директоры Валерий Сазанов Татарстан Республикасы территориясендә газ белән тәэмин итү сферасында көйләнүле эшчәнлекне тормышка ашыру шартлары турында килешүне имзаладылар. Чарада Татарстан Премьер-министры Алексей Песошин да катнашты.Килешү, аерым алганда, Алабугадан алып Түбән Кама сәнәгать узелы объектларына кадәр булган арада - 30 километрга якын озынлыктагы югары басымлы бүлү газүткәргечен төзү, кулланышка тапшыру һәм алга таба «Газ-транспорт компаниясе» ҖЧҖ тарафыннан хезмәт күрсәтү сорауларына кагыла.
Татарстан Республикасы Президенты матбугат хезмәте материаллары буенча.
Фото: president.tatarstan.ru
Иң мөһим һәм кызыклы язмаларны Татмедиа Telegram-каналында укыгыз
