«МойТатарстан» фотомарафонында җиңүче квадрокоптер алачак
Фотомарафонда катнашу өчен «ВКонтакте» яисә «Инстаграм» социаль челтәрләрендә аккаунтың булу таләп ителә.
«МойТатарстан» фотомарафонының максаты – кулланучыларга социаль челтәрләр өчен сыйфатлы контент булдырырга ярдәм итү (фотографияләр, видеороликлар). Фотомарафон #ПрекрасныйТатарстан блогтуры проектының дәвамы булып тора. Әлеге проектта блогерлар Татарстанның матур урыннарын ачалар, үзләренең социаль челтәрләрендә фотографияләре һәм видеолары белән уртаклашалар.
Хәзерге вакытта #ПрекрасныйТатарстан хештегы астында 1600 фотография урнаштырылган, 1000нән артык катнашучы теркәлгән. Фотомарафонда катнашу өчен «ВКонтакте» яисә «Инстаграм» социаль челтәрләрендә аккаунтың булу таләп ителә. Аны оештыручылар 25 бирем (бер атнага 5 бирем) әзерләп куйганнар. Кулланучылар, аларны үтәп, Татарстан турында кызыклы фотолар төшерү күнекмәләрен камилләштерәләр.
Биремнәрне «ВКонтакте»да Фотомарафон #МойТатарстан төркемендә табарга була, эшләрне социаль челтәрләрдә #ПрекрасныйТатарстан һәм #МойТатарстан хештэглары астында урнаштыра барырга кирәк.
Проект кысаларында мастер-класслар, вебинарлар һәм онлайн-дәресләр оештырыла. Марафонның экспертлары сыйфатында танылган Казан фотографлары һәм блогерлары чыгыш ясаячак: Олег Самойлов, Артем Горланов һәм Настя Губинская.
Җиңүчеләр кыйммәтле бүләкләр белән бүләкләнәчәк, алар арасында квадрокоптер, көзгесез фотокамералар, акыллы колонкалар, экшн-камера һ.б.ш бар. Бүләкләү тантанасы 13 сентябрьдә уздырылачак. Марафонга теләсә кайсы көнне, 8 сентябрь – эшләрне кабул итү тәмамланганчыга кадәр кушылырга мөмкин.
Фото: Светлана Әбҗәлилова, 2019 елгы марафонда призер.
Иң мөһим һәм кызыклы язмаларны Татмедиа Telegram-каналында укыгыз
